షాపింగ్ మాల్స్లో లేదా ఆన్లైన్ స్టోర్లలో వస్తువుల ధరలు 99, 999, 9999 వంటి సంఖ్యలతో కనిపిస్తుంటాయి. ఒక రూపాయి తక్కువగా ధర నిర్ణయించడం వెనుక కేవలం లెక్కల తేడా మాత్రమే లేదు, వినియోగదారులను ఆకర్షించే ఒక బలమైన వ్యాపార సైకాలజీ దాగి ఉంది. చాలామంది దీన్ని సాధారణ ఆఫర్గా భావించినప్పటికీ, ఇది కొనుగోలుదారుల మెదడుపై చూపే ప్రభావం చాలా ఎక్కువ.
శాస్త్రవేత్తలు దీన్ని 'లేఫ్ట్ డిజిట్ ఎఫెక్ట్' అని పిలుస్తారు. మానవ మెదడు ఏదైనా సంఖ్యను చూసినప్పుడు ఎడమ వైపు ఉన్న మొదటి అంకెను మాత్రమే ఎక్కువగా గుర్తుంచుకుంటుంది. ఉదాహరణకు, ఒక వస్తువు ధర 1000 రూపాయలు అని ఉంటే అది నాలుగు అంకెల మొత్తంగా కనిపిస్తుంది. అదే 999 రూపాయలు అని రాస్తే, మన మెదడు దాన్ని 900 శ్రేణికి చెందినదిగా భావిస్తుంది తప్ప, 1000కి దగ్గరగా ఉందని గుర్తించదు. ఈ చిన్న తేడాతో తక్కువ ధరకే వస్తువు లభిస్తోందనే భ్రమను వ్యాపారులు సృష్టిస్తారు.
పెద్ద బ్యానర్లు పెట్టి 1500 రూపాయల వస్తువును 999 రూపాయలకే ఇస్తున్నామని ప్రకటించినప్పుడు, వినియోగదారులలో డబ్బు ఆదా అవుతుందనే తృప్తి కలుగుతుంది. నాలుగు అంకెల ధర మూడు అంకెలుగా మారడం వల్ల కలిగే ఈ సంతోషం, వినియోగదారుడి బలహీనతలను ఆసరాగా చేసుకుని విక్రయాలను పెంచే అద్భుతమైన అస్త్రంగా మారుతుంది.
చివరగా, కొనుగోలు పూర్తయ్యాక చాలామంది కస్టమర్లు ఆ ఒక్క రూపాయి చిల్లరను తిరిగి అడగడానికి సంకోచిస్తారు. వినియోగదారుడికి ఆ ఒక్క రూపాయి చిన్నదిగా అనిపించినా, వేల మంది కస్టమర్ల దగ్గర మిగిలిపోయే ఆ చిల్లర మొత్తం రోజు చివరికి వ్యాపారులకు భారీ లాభంగా మారుతుంది.
