తెలంగాణ భవన్లో మీడియాతో మాట్లాడిన బీఆర్ఎస్ వర్కింగ్ ప్రెసిడెంట్ కేటీఆర్, రాష్ట్రంలోని యువత తీవ్ర నిరాశలో ఉన్నారని పేర్కొన్నారు. ఎన్నికల ముందు కాంగ్రెస్ నేతలు డిక్లరేషన్ల పేరుతో హామీలు ఇచ్చి, అధికారంలోకి వచ్చాక వాటిని విస్మరించారని ఆయన విమర్శించారు. గత రెండున్నరేళ్లుగా ప్రభుత్వం జాబ్ క్యాలెండర్ విడుదల చేయలేదని ఆయన గుర్తు చేశారు.
రాష్ట్రంలో 20 వేల పోలీసు ఉద్యోగాలు ఖాళీగా ఉన్నప్పటికీ, కేవలం 7 వేల ఉద్యోగాలకే నోటిఫికేషన్ ఇవ్వడంపై కేటీఆర్ ప్రశ్నించారు. ఖమ్మంలో ఒక విద్యార్థి ఆత్మహత్యాయత్నం చేసిన విషయాన్ని ప్రస్తావిస్తూ, ఆ విద్యార్థి రాసిన లేఖ సూసైడ్ నోట్ కాదని, అది కాంగ్రెస్ ప్రభుత్వంపై రాసిన ఛార్జ్ షీట్ అని ఆయన అభివర్ణించారు. నిరుద్యోగుల సమస్యలపై రాహుల్ గాంధీ ఎందుకు స్పందించడం లేదని, ఆయన హైదరాబాద్ ఎందుకు రావడం లేదని కేటీఆర్ నిలదీశారు.
సీఎం రేవంత్ రెడ్డి ఇంజనీరింగ్ విద్యార్థులను ఉద్దేశించి చేసిన వ్యాఖ్యలపై కేటీఆర్ తీవ్ర ఆగ్రహం వ్యక్తం చేశారు. విద్యార్థులను 'క్రిమినల్ వేస్ట్' అని సంబోధించడం సరికాదని, అత్యధిక క్రిమినల్ కేసులున్న వ్యక్తిని ముఖ్యమంత్రిని చేయడమే అసలైన క్రిమినల్ వేస్ట్ అని ఆయన ధ్వజమెత్తారు. హామీల అమలుకు నిధులు లేవని చెబుతూనే, అందాల పోటీల కోసం ప్రభుత్వం రూ. 200 కోట్లు ఖర్చు చేయడంపై ఆయన మండిపడ్డారు.
బీఆర్ఎస్ హయాంలో 2 లక్షలకు పైగా ఉద్యోగాలకు నోటిఫికేషన్లు ఇచ్చామని కేటీఆర్ గుర్తు చేశారు. విద్యార్థులు ఆత్మహత్యలు చేసుకోవద్దని విజ్ఞప్తి చేసిన ఆయన, భవిష్యత్తులో పక్కా ప్రణాళికతో తమ పార్టీ మళ్లీ అధికారంలోకి వస్తుందని ధీమా వ్యక్తం చేశారు. కాంగ్రెస్ ప్రభుత్వం అధికారంలోకి వచ్చాక ఇప్పటివరకు ఎన్ని ఉద్యోగాలు భర్తీ చేసిందో శ్వేతపత్రం విడుదల చేయాలని ఆయన డిమాండ్ చేశారు.
