మంచిర్యాల జిల్లా చెన్నూర్ పట్టణంలోని అంబేద్కర్ చౌక్ నుంచి రావిచెట్టు వరకు చేపట్టిన రోడ్డు విస్తరణ పనులను బీజేపీ జిల్లా అధ్యక్షుడు నగునూరి వెంకటేశ్వర్ గౌడ్ సోమవారం పరిశీలించారు. పనులు ప్రారంభమై మూడు నెలలు దాటినా, డ్రైనేజీ మరియు ప్రధాన రహదారి నిర్మాణం పూర్తిస్థాయిలో జరగడం లేదని ఆయన అసహనం వ్యక్తం చేశారు.
ఈ పనుల్లో జరుగుతున్న జాప్యం వల్ల స్థానిక వ్యాపారులు ఆర్థికంగా నష్టపోతున్నారని వెంకటేశ్వర్ గౌడ్ ఆరోపించారు. రోడ్డు వెడల్పు, డ్రైనేజీ వ్యవస్థ, సర్కిళ్లు మరియు లైటింగ్ ఏర్పాటు వంటి అంశాలపై అధికారులు ప్రజలకు స్పష్టత ఇవ్వాలని ఆయన డిమాండ్ చేశారు. రహదారిని ఒకే పద్ధతిలో కాకుండా, అక్కడక్కడా మార్పులు చేస్తూ పనులు చేపట్టడంపై మున్సిపల్ అధికారుల తీరును ఆయన తప్పుబట్టారు.
మంత్రి వివేక్ వెంకటస్వామి తన సొంత నియోజకవర్గంలోని అభివృద్ధి పనులపై సరైన పర్యవేక్షణ చేయడం లేదని వెంకటేశ్వర్ గౌడ్ విమర్శించారు. స్వల్ప వర్షానికే డ్రైనేజీ నీరు పేదల ఇళ్లలోకి చేరుతోందని, దుర్వాసనతో ప్రజలు ఇబ్బందులు పడుతున్నా అధికారులు స్పందించడం లేదని ఆయన పేర్కొన్నారు. ఇది ప్రభుత్వ నిర్లక్ష్యానికి నిదర్శనమని ఆయన వ్యాఖ్యానించారు.
ఇప్పటికైనా మంత్రి వివేక్ వెంకటస్వామి జోక్యం చేసుకుని, పనులను వేగవంతం చేసేలా అధికారులను ఆదేశించాలని ఆయన కోరారు. ప్రజలు, వ్యాపారుల సమస్యలను పరిష్కరించని పక్షంలో, బీజేపీ ఆధ్వర్యంలో పెద్ద ఎత్తున ఆందోళనలు చేపడతామని ఆయన హెచ్చరించారు.
